BRABUS ka prezantuar 900 ROCKET EDITION CABRIO, versionin e parë të familjes ROCKET me karroceri të hapur, të bazuar në Mercedes-AMG G 63.

Modeli është pajisur me një çati tekstili që hapet dhe mbyllet në mënyrë elektrike. Për zhvillimin e saj janë përdorur më shumë se 500 komponentë të rinj, ndërsa struktura është përforcuar për të ruajtur qëndrueshmërinë e automjetit.

Në pjesën mekanike, G 63 është modifikuar me një motor V8 Biturbo 4.5 litra, i cili zhvillon 900 kuaj fuqi dhe 1.250 Nm çift rrotullues. Përshpejtimi 0–100 km/h realizohet për vetëm 3.7 sekonda, ndërsa shpejtësia maksimale është e kufizuar në 240 km/h.

Në pjesën e jashtme, modeli ka paketën Widebody të BRABUS, elemente prej karboni, grilë të përparme me ndriçim dhe disqe 24-inç Monoblock II EVO “Platinum Edition” me elemente aerodinamike prej karboni.

Kabina është e punuar me lëkurë të zezë dhe Alcantara, me detaje të kuqe dhe elemente prej karboni, sipas stilit BRABUS Masterpiece.

BRABUS do të prodhojë vetëm 10 ekzemplarë të 900 ROCKET EDITION CABRIO. Çmimi i publikuar nis nga rreth 890.740 € pa TVSH.

Një G 63 i modifikuar nga BRABUS, këtë herë me mundësinë për të udhëtuar edhe me çatinë e hapur.