BMW sapo ka publikuar një imazh të parë paralajmërues të sedanit luksoz, Seria 7 për vitin 2027, i cili pritet t’i nënshtrohet një “facelift”-i (freskimi të dizajnit) në modelin e ardhshëm. Prodhuesi gjerman postoi në llogarinë zyrtare të Instagramit një fotografi misterioze, ku dritat e përparme dhe grila e ndriçuar shkëlqejnë mes errësirës.

Ky model luksoz i përmasave të mëdha nuk pritet të jetë një gjeneratë krejtësisht e re, por një freskim i mesit të ciklit për gjeneratën G70, e cila u lançua fillimisht në vitin 2023. Për momentin, ajo që mund të konfirmojmë me siguri është se Seria 7 do të vijë me një pjesë të përparme të ridizajnuar.

Fenerët e ndarë mbeten pjesë e dizajnit, por duket se do të kenë një pamje edhe më elegante dhe më të sofistikuar se më parë. Sigurisht, nuk mund të mungonte grila ikonike “kidney”, e cila këtë herë theksohet nga një ndriçim përgjatë gjithë perimetrit të saj.